Asti Lekuko LH1 Santimamiñen
Aste honetan Asti Lekuko Lehen Hezkuntzako 1. mailako ikasleak Santimamiñe kobazuloa bisitatzera joan dira. Asteazkenean A eta D gelakoak eta ostegunean B eta E-koak, hain zuzen. Esan digutenaren arabera oso bisitaldi polita izan zen eta interes handiko hainbat gauza ikasi zituzten.
UNESCOk 2008an Gizateriaren Ondare izendatutako kobazulo hauek inguru paregabean daude: Urdaibaiko arroaren eskuinean, Ereñozar mendiaren magalean.
Leizeko labar-pinturak ezustean aurkitu zituzten 1916an, gazte batzuen jakin-minaren ondorioz. Hainbat animaliaren irudiekin (bisonte, zaldi, ahuntz, orein eta hartz arrearenak, esaterako) osatutako labar-pintura garrantzitsua jasotzen du kobazuloak.
Santimamiñeko haitzuloak ederrak dira oso geologiaren ikuspuntutik; estalagmitak eta estalaktitak ugari ditu, eta batzuetan, gainera, batu egiten dira, haitzulo guztian zutabe bikainak osatzen direlarik. Gainera, hormetan konkrezio mantu ederrak ditu. Horiek, batzuetan, kaltzio karbonatozko gortina finak sorrarazten dituzte -zenbaitetan zuriak, beste zenbaitetan gorrixkak- urek daramaten burdin oxido karga dela eta.
2006az geroztik haitzuloak itxita daude. Hala ere, ordu eta erdiko bisitaldi gidatuetan parte hartzeko aukera badago.
Argazkiak ikusteko sakatu irudiaren gainean
