Agurra

Familia agurgarriak:

Ilusioz aurkezten dizuegu 2024-2025 ikasturteko gida.

Ohi bezala, kooperatibaren informazio instituzionala, ikasturteko helburuak, ordutegien, egutegien, kuoten eta zerbitzuen aipamen praktikoak eta, jakina, gainerako guztiari zentzua ematen dioten ikasle-taldeak biltzen ditu. Espero dugu, aurten ere, praktikoa izatea eta Asti Leku osatzen dugun pertsona guztien gustukoa izatea.

Kudeaketari dagokionez, ekaineko Ohiko Batzarrean azaldu zen bezala, gure helburua emaitza positiboak lortzea da, ikastolan espero ditugun inbertsioei aurre egin ahal izateko. Espero dugu datozen hilabeteetan oso aurrerapen esanguratsuak izatea eta lehen faseko obrekin hasteko aukera ematea (urbanizazioa eta batxilergoko eraikina).

Matrikulei dagokienez, emaitza pozgarria izan dela esan dezakeku, egungo jaiotza-tasa txikiko egoera aintzat hartuta. Ikasturte honetarako, bi urtekoen 4 gela osatzea lortu dugu, eta, batxilergoari dagokionez, lehen mailako gelak erabat beteta ditugu. Egoera hori, jakina, bi ahoko arma da; batetik, pozten gara gure eskaintzak oso harrera ona duelako, eta, bestetik, etapako instalazioekiko kezka dugu, argi baitago modernizatzea eta egungo eta etorkizuneko proiektu pedagogikora egokitzea eskatzen dutela.

Aurten plan estrategiko berria ezartzen hasi gara: “ikastolago 2.0”. Bere oinarrian aurreko hirurtekoaren diseinua inspiratu zuten indar ideia berberak daude, horregatik berriz ere “Ikastolago” leloa darama. Gure filosofia eta balioak mantentzea eta handitzea da asmoa; ikastola gehiago izatea, euskaldunagoa, parte-hartzaileagoa, baliabidez hornituagoa eta gure ingurunera eta gizartera irekiagoa, gero eta anitzagoa eta askotarikoa.
Asti Lekuk beti izan du harro egoteko modukoa Ezkerraldeko euskalduntzean eta hezkuntzan eragile garrantzitsuenetako bat izatea. Garai honetan, lan horrek eskakizun berri bat jartzen digu aurrean: inklusiboagoak izatea lortu behar dugu, gure eskualdeko gizarteak partaide, kooperatibista eta lagun sentitzeko moduko proiektutzat har gaitzan.
Gela eta jolastokietako sentsazioa motibaziozkoa eta lasaia da. Elkarbizitza onaz gozatzen ari gara, eta badirudi ikasleek ikasturte hasierako animo horiek ekarri dituztela, ebaluazio guztietan zaindu eta mantendu behar ditugunak. Beraz, oinarririk onenetik abiatzen gara ikastola guztiok nahi dugun Asti Leku izan dadin, eta hezkuntza komunitate euskalduna, autoexijentea, inklusiboa, demokratikoa eta ikasten duena izan gaitezen.

Azkenik, ziur gaude guztion artean lortuko dugula 2024-2025 ikasturte hau zoriontsua eta emankorra izatea gure 1468 ikasleentzat, haien familientzat eta ikastolako profesionalentzat. Talentua eta ikasteko gogoa badaude; adiskidetasuna eta laguntasuna ere bai; eta, gainera, lanaren etika eta energia (baita fotovoltaikoa ere) baditugu ahalegintzeko. Horrekin guztiarekin, baikortasuna baino ez dugu izan behar.

Asti Lekuko Zuzendaritza