Agurra

Familia estimatuak:
“Ikasturte hau ondo hasi da”. Horixe da Zuzendaritza Taldearen sentsazioa aste batzuetako lanaren ondoren. Ikasleak atseden hartuta eta gogotsu itzuli dira oporretatik: ikastolan zehar askatasunez mugitzen dira, gela ezberdinen artean erlazionatzen dira, arnasa hartzen dute, besarkatzen dira, aire zabalean jolasten dira, irribarre egiten dute eta ezerk ez du haien aurpegietako adierazpena estaltzen. Profesionalak ere pozik daude denok gozatu ahal izango dugulako “normaltasun berriaz”. Bai, denon artean lortu dezakegu urte bikaina izatea.
Egia da ikastolan, familietan bezala, krisiaren ondoriozko ziurgabetasun ekonomikoei aurre egin beharko diegula, eta -gainera- hezkuntzako euskal lege berri bati egokitu beharko gatzaizkiola, zirriborroak oraindik galdera garrantzitsu batzuk sortzen dizkigularik. Nolanahi ere, baikortasunez espero dugu behin betiko testua hezkuntza-itunaren araberakoa izatea, itun horren oinarrizko abiaburuak desitxuratu gabe.
Oraindik guztiz argia ez den legezko etorkizun hori alde batera utzita, ikasturte honetan gure plantilla nabarmen berritu da. Profesional gazteak ditugu, ilusio eta berrikuntza handia eskainiko diotenak gure lan egiteko moduari, urteetan Asti Lekuren oinarrizko zutabe izan diren beste belaunaldi historiko bateko pertsona batzuek utzitako jarduteko era bikainari eutsiz. Ongi etorri eta animo gazteentzat eta aitormen zintzoa beteranoentzat.
Ikastolaren beste alderdi orokor batzuei dagokienez, GIDA honen beste atal batean jasotako ikasturtearen helburuak berrikustera gonbidatzen zaituztegu. 21-24 Plan Estrategikoan zehaztutako bidetik jarraituko dugula egiaztatuko duzue. Geure burua izatea eragiten diguten gauzetan eragitea da kontua: euskara gehiago, parte-hartze handiagoa, ingurunean integrazio handiagoa eta – agintarien baimenarekin – hori guztia baliabide hobeez hornituta. Hobekuntzaren bidea garenari irmo eustea da, ikastolago izatea.
Familientzat eta ikasleentzat esan nahi dizuegu guztion artean ondo aprobetxatutako ikastaro bat egin dezakegula. Ikasleek, eskuratu behar dituzten gaitasunetan aurrera egiteaz gain, hilabete batzuetako adiskidetasuna eta bizikidetza ona gogorarazteko ikasturtea konpartitzea lortu ahal dute. Ezerk ez digu eragozten, beraz, ez dago aitzakiarik.
Azkenik, adierazi nahi dizuegu ikasturte honetan Asti Leku Klubak 40. urteurrena ospatuko duela. Iraganaz harro egoteko eta etorkizuna prestatzeko aukera bikaina. Kirol inklusiboagoa lortu behar dugu gure neska eta mutilentzat. Esandakoaz gainera, helburu pertsonal bat ere atera genezake: ea Asti Lekuko komunitate osoak aurten kirol asko egiten dugun. Animo kirolariak!
Zuzendaritza taldea